Dɨga jɨaɨe rarokɨaɨ iemo dane kaɨ ría yɨziyajɨa “amaflora” meidofikaɨde, komo uibiñogafue SENA daɨdɨfuiaɨdo onoiyena jideka dɨga colombianotɨaɨ iemo jɨaɨmakɨ guirabanimo dukɨtatɨfue.

Leticia (amazonas) 30 de junio de 2023. Colombia emodoide jɨaɨe enɨe, ɨere kadɨniarede nanɨemo, iemo abɨ ɨnua izoi moniya namaninɨe kadɨnuiana, ua aiyo ierede.

Ua jaka uafeuna moniya namaninɨemo paismona jɨaɨe baɨmo aiyonɨe, dɨnomo komo uibiñogafue “amaflora” SAS, moniya namaninɨe, tameinafue aiyue jazikɨ eromo kenire kɨoide rairuioikana ie ñefuiaɨ oyena, afenɨa fɨgo jaeragɨmaɨ ononafuiaɨdo iemo dɨno ite komɨnɨ taɨjɨedo, Yɨzɨdɨjɨa tameina ñefikaide nanɨemo fekayena.

Rafael Clavijo, “mundo amazonico uiñotɨmɨe” kaifoidɨyaɨma iemo “amaflora” uibiñotɨmɨe. bie enɨe jitó iemo e jokoinama kɨodɨno raifide tanɨado ɨere kaɨmare eroidɨmɨe. é komuiya mona arɨ beno imakɨ iemo jɨaɨfene imakɨ bebefemo jaɨnaidɨmɨe ñueriede raɨena akatajanuiaɨmo taɨjɨde, uafuena naɨraɨ jɨkanogafuiaɨ dɨnomo ite, nana kaɨ kɨoina itɨnuiaɨmo.

Afe dɨga de raifizɨte ranɨa kɨgɨmo bie moniya namaninemo komuioide, diga jɨaɨe íe amenanɨaɨ. Ua báa nagafezi fɨmonanɨaɨ dɨno, rairuidena iemo oni jebuitayena aiyue fɨnoriyena riga, rarokɨaɨna e mei meiñoga beno imakɨado iemo makamakɨado.

Moniya namaninɨe ziorede amenaɨaɨna iemo dɨno rajɨana ferede jaka jɨaɨnomo iñede bie amenaikɨ jinoomo binɨemo, daɨde Rafael.

Bie jaeragɨmaɨa ononagafuiaɨ onona, makamakɨ rajɨnɨa iemo amenanɨa rauaɨnɨaɨ onoikana iberi, dɨga jɨaforiede rajɨaɨ akatayena úiakadɨaoɨ. Bie atɨkafuaɨ nanomona kaɨ taɨneka, makamakɨ jɨkaja izoi moniya namaninɨiaɨ dɨga jɨaɨforiede rarokɨaɨ jɨkafɨredɨaɨoɨ. jitoma uyieri zafenaiyari atɨkafuiaɨdo bandejaɨaɨmo, jitoma anamo jonefɨredɨkaɨ dá nanomo daɨde uibiñotɨmɨe.

Meita afemoma, Rafael aiyo faɨfiñede raɨedo jetajanomo komuide ranɨaɨ fɨnorenama kɨode ba jino kome iyanomona, tamia izoi eroikana komuide uibiyafuiaɨ afenɨaɨ. “amaflora” mameide iyiaɨ zafenua yezika taɨjɨemona oye ranɨaɨ. fɨnorede (fɨnona) jaka duiñeno jitoma agaiñuarí, meita datɨbadeza, Rafael íe nabaidɨno dɨga jɨaɨfuemo oi jaiyena tuiranomo tuikana. “ñuera rá komuioikaide, iemo aiyo jino komuitaioidɨkaɨ, iemo SENA dukɨde iemo e fondo emprender dɨga
kaɨ kɨgɨmo” eɨtate.

Moniya namanimo jaɨnoidɨnɨe ie SENAmo fonde empender íe jino akatafuiaɨmo abɨ akatajide Rafael dɨno taɨjɨe uibiraɨmana taɨnede, e faɨriotadɨno, nado e mamekano faɨrioga.

Zafenaitara ráa ote, fɨnoka rá joneyɨchekuaɨ iemo tamekanuiaɨ mamekɨaɨ nitayɨbiaɨ ɨere raifide; jitoma daɨna izuruaɨ fɨnokafuiaɨ ba tikuna izoi, boraɨ, yucunaɨaɨ nana iaɨoɨ jamanomo ononafuiaɨ iemo jaka iyafuiaɨ diga.

Amaflora dɨga, dɨga jɨaɨenɨaɨ rarokɨaɨ bá jambú, sidrera iemo campi santi; uzireoikana jiruado jeire oga ziore tamebidena. Afe eruemo efetɨno dotɨno ite iemo jɨaɨ jagɨiyɨ faɨrokanɨaɨa dote; daɨi daɨde Rafael.

Iraɨnomo, SENA jenokafuiaɨ yote, “amaflora” jinomonatayena íemo nabefuena maɨrikɨnano itatayena iemo moniya namaninɨaɨ ɨeredɨmɨe izoi eoikana. Moniya namanínɨemo danɨ úa mamenɨaɨna fɨdɨdɨkaɨ naná dɨga jɨaɨfuriedena ierede iemo kaɨ iyanɨe dɨga iemo bie nanɨe naɨraɨ dɨga fekariyɨfue mona ja dukɨde.

Bifuiaɨ nɨ kaɨna ranɨaɨna fɨnotɨjɨna komofuena iñede íe jínomo SENA iemo fondo emprender kanuado, fuitade.

Oficina de Comunicaciones Regional Amazonas
Karen Lemos/SCG/CAGM

Traducción al Murui: Ginel Dokoe Gimaido (aprendiz) y Elicio Zafiama Moreno

Enlace original: https://www.sena.edu.co/es-co/Noticias/Paginas/noticia.aspx?IdNoticia=6535 TRADUCIDO Ahttps://www.sena.edu.co/es-co/Noticias/bptraducidos/BP%20-%20Amazonas%20...